كيف تعرف إذا هاتفك مراقب أو مخترق؟ أكواد فحص التجسس 2026 (للآيفون والأندرويد)

كثير مرات بنحس إنه "الموبايل مش طبيعي". البطارية بتفضى بسرعة خيالية، الجهاز بسخن وهو بجيبتك، أو حتى بتسمع أصوات غريبة وقت المكالمات. السؤال اللي بيخوف فوراً: "معقول جهازي مهكر أو مراقب؟".

في 2026، طرق الاختراق تطورت، بس كمان طرق الحماية صارت أذكى. في هذا المقال، رح نعطيك "الزبدة": أكواد بسيطة (USSD Codes) بتكشفلك إذا في حدا بيسمع مكالماتك أو بيوصل لرسائلك، وبدون ما تنزل برامج معقدة.

علامات بتفضح وجود تجسس على هاتفك

قبل ما نجرب الأكواد، راقب جهازك. إذا شفت هاي العلامات، لازم تشك بالموضوع:

نفاذ البطارية والداتا: إذا حزمتك بتخلص بنص الشهر وأنت ما فتحت يوتيوب كثير، في اشي غلط بصير بالخلفية.

سخونة الجهاز المفاجئة: الموبايل نار وأنت ما بتلعب عليه؟ ممكن في برمجية تجسس شغالة وبترسل بياناتك.

ظهور تطبيقات غريبة: فجأة لقيت تطبيق ما نزلته؟ إياك تفتحه، احذفه فوراً.

أكواد كشف التجسس (جربها الآن)

هاي الأكواد بتشتغل على كل الشبكات في الأردن (زين، أمنية، أورنج) وعلى الآيفون والأندرويد. افتح لوحة الاتصال واكتب الكود من اليسار لليمين واضغط اتصال:

1. كود كشف تحويل المكالمات *#21#

وظيفته: بفرجيك إذا مكالماتك أو رسائلك بتتحول لرقم ثاني وأنت مش عارف.

النتيجة الطبيعية: لازم يطلعلك "Not Forwarded" أو "لم تتم إعادة التوجيه" عند كل الخيارات (الصوت، البيانات، الرسائل).

النتيجة الخطيرة: إذا طلعلك رقم تلفون غريب جنب أي خيار، معناها مكالماتك بتوصل لهذا الرقم!

2. كود التحويل عند "خارج التغطية" *#62#

وظيفته: بيكشف وين بتروح مكالماتك لما يكون تلفونك مغلق أو ما في إرسال.

تنبيه: غالباً رح يطلعلك رقم "البريد الصوتي" الخاص بشركة الاتصالات، وهذا طبيعي وما بخوف. بس اتأكد إنه الرقم تابع لشركتك مش رقم شخصي.

3. كود "الفورمات" وإلغاء التجسس ##002#

وظيفته: هذا الكود "المنقذ". بمجرد ما تطلبه، بيلغي كل عمليات تحويل المكالمات اللي معمولة بجهازك (سواء إنت عملتها أو الهكر عملها).

نصيحة: استخدمه بشكل دوري لتنظيف إعدادات الاتصال.

كيف أحمي حالي في 2026؟

الحماية مش بس أكواد، الحماية "وعي".

تحديث النظام: لا تضل تأجل تحديث الأندرويد أو iOS. التحديثات بتسكر ثغرات أمنية خطيرة.

الروابط: جملة بنعيدها مليون مرة: "لا تكبس على رابط مجهول"، حتى لو وصلك من أخوك (ممكن حسابه مهكر).

كلمات السر: لا تستخدم "123456". خليك مبدع شوي واستخدم المصادقة الثنائية (2FA).

💡 رأيي الشخصي ونصيحة من القلب
يا جماعة، خلينا نكون واقعيين: مش كل ما الموبايل يعلق معناها "المخابرات الروسية بتراقبك"! في 90% من الحالات، البطء بيكون سببه كثرة التطبيقات وقلة مساحة التخزين. بس هذا ما بيمنع إنك تكون حريص. أخطر نوع تجسس اليوم هو "الهندسة الاجتماعية"؛ يعني واحد يرن عليك يقلك "أنا من البنك، أعطيني الكود اللي وصلك". هذا اللي بيسرقك وأنت بتضحك، مش برامج الهكر المعقدة. ديروا بالكم على حالكم وعلى أهاليكم الكبار بالسن من هاي الحركات.

الأسئلة الشائعة (FAQ)

هل ضبط المصنع (Format) بيلغي التجسس؟ نعم، بنسبة كبيرة جداً. إعادة ضبط المصنع بتمسح أي برمجيات خبيثة انزرعت بالجهاز، وبيرجع كأنه جديد. بس تأكد تاخذ نسخة احتياطية لصورك المهمة قبلها.

هل الكاميرا الأمامية ممكن تصورني وأنا مش عارف؟ في الهواتف الحديثة (آيفون وأندرويد 12 وفوق)، صار في "نقطة خضراء" بتضوي أعلى الشاشة لما الكاميرا أو المايك يشتغلوا. إذا شفت النقطة ضوت وأنت مش فاتح الكاميرا، اعرف إنه في تطبيق قاعد يتجسس عليك.